SEPPA na Minister Bikker: Busca otro caminda pa aloca Trudy Hassell

Na salida di e reunion cu Minister di Husticia Andin Bikker, Edmundo Marlin vice presidente di Sindicato di Empleadonan Publico y Priva (SEPPA) a informa cu nan a keda insisti pa busca un otro caminda pa aloca sra. Trudy Hassel.

A trece tur e puntonan di e trahadonan di Guarda Nos Costa (GNC) cu ta malcontento cu su forma di atende cu nan y e maneho di represalia cu e ta hiba contra esnan cu no ta di acuerdo cun’e , of tribi di bisa algo contra dje. E reunion entre e delegacion di SEPPA y Minister Bikker a dura casi dos ora. Por a mira cu na salida, sra. Trudy Hassell a yega pa un reunion cu e Minister tambe. Intimidacion, menasa y falta di respet pa trahadonan cu a bin ta tumando luga pa algun tempo caba, tabata temanan cu SEPPA a hiba na conocemento di e mandatario.

E vice presidente di SEPPA tabata compaña pa delegadonan di GNC, kendenan a splica e mandatario tur loke cu nan a bin ta pasando aden, desde cu sra. Hassell a asumi e posicion di maneha e departamento aki, no manera un hefe pero manera un dictador, manera a ser menciona den nan carta di protesta tambe.

Awe dialuna, no ta prome biaha cu e Minister di Husticia ta keda confronta cu e hechonan aki. Como cu el a sosode varios biaha caba, e sindicato e biaha aki a pidi su miembronan pa pone tur e puntonan di preocupacion den un carta y cu esaki a pidi un reunion cu e mandatario cual a tuma luga awe, dialuna, pa 3’or di atardi.

“Bo no por tin un servicio unda cu ta obvio cu e trahadonan no ta contento cu e hefe. Nos a bisa Minister bon cla awe cu e trahadonan no ta dispuesto pa sigui traha cu sra. Hassell y a pidi’e pa busca un otro persona pa dirigi GNC pasobra tanten cu sra. Hassell keda eynan e problemanan lo keda.”

E problema ta cu tin un grupo minoria cu ta apoya Hassell contra e grupo grandi di trahadonan cu ta contra e forma di maneha di Hassell. Hasta a sosode, segun Marlin a splica, cu un contractant a sinti represalia. E sindicato tin miedo cu e problemanan lo escala si e señora sigui den e posicion.

“Mester di un hende imparcial den e posicion ey,” e delegacion di e sindicato ta demanda. Minister a informa SEPPA cu el a ricibi e carta di 30 punto y cu e lo bay analis’e. A haci un apelacion na e Minister pa haci esaki mas lihe posibel pasobra ta trata di puntonan hopi valido cu ta exigi pa e tuma accion.

“E malcontento, cu ta bini di e mayoria di e trahadonan, ta bay causa un problema si e Minister no hala sra. Hassell for di eynan.” E mandatario a pidi e sindicato tempo, pero e contesta di SEPPA ta cu mester haci hopi lihe pasobra e trahadonan a dicidi caba cu si e Minister no tuma un posicion, e trahadonan si lo tuma un posicion.”